Tónlistarskóli Reykjanesbæjar

Tónlistarskóli Reykjanesbæjar, Tónlistarfélag Reykjanesbæjar og Menningarsvið Reykjanesbæjar standa að fjölskyldutónleikum laugardaginn 17. nóvember n.k. í samstarfi við Félag íslenskra tónlistarmanna, FÍT. Á tónleikunum kemur fram Kammerhópurinn Shehérazade sem er blásarakvintett, ásamt Sigurþóri Heimissyni leikara, sem er sögumaður á tónleikunum.  Tónleikarnir sem eru u.þ.b. 50 mínútna langir, verða í Stapa kl.14.00.

Kammerhópurinn Shehérazade, sem er skipaður þeim Pamelu De Sense á þverflautu, Eydísi Franzdóttur á óbó, Kristínu Mjöll Jakobsdóttur á fagott, Rúnari Óskarssyni á klarinett og Emil Friðfinnssyni á franskt horn, var stofnaður árið 2008, hefur það að markmiði að flytja klassíska tónlist fyrir börn. Frá því hópurinn var stofnaður hefur hann flutt ævintýrið um Pétur og úlfinn 26 sinnum á tónleikum og Karnival dýranna. Bæði verkin voru flutt í Salnum í Kópavogi og var flutningi þeirra mjög vel tekið.

Shehérazade hópurinn hefur staðið fyrir fjölskyldutónleikaröð sem nefnist ,,Töfrahurð”. Tónleikaröðin er haldin í samvinnu við Salinn í Kópavogi og er tónleikunum ætlað að opna ævintýraveröld tónanna fyrir börnunum. Auk þess að leika í Salnum hefur ,,Shehérazade” hópurinn komið fram í Þorlákshöfn og á Ísafirði.

Nokkur íslensk tónskáld hafa samið sérstaklega fyrir Kammerhópinn Shehérazade, en þau eru Oliver Kentish, Elín Gunnlaugsdóttir, Steingrímur Þórhallsson og Guðmundur Steinn Gunnarsson.

Sigurþór Heimisson er útskrifaður leikari frá Leiklistarskóla Íslands  og hefur leikið fjölda hlutverka í atvinnuleikhúsum landsins. Núna er  hann að leika í tveimur verkum sem flakka á milli grunn- og  framhaldsskóla. Hann kennir framsögn og raddbeitingu í Háskólanum í  Reykjavík.

Efnisskrá fjölskyldutónleikanna laugardaginn 17. nóvember í Stapa er eftirfarandi:

R. Goldfaden:       Saga tréblásturshljóðfæranna

S. Prokofiev.          Pétur og úlfurinn, tónævintýri Op. 67

Pétur og úlfurinn er ævintýri fyrir leiklestur og hljómsveit og er bæði sagan og tónlistin eftir rússneska tónskáldið Sergei Prokofiev. Prokofiev hafði farið með syni sína tvo í tónleikhús barna í Moskvu og þar datt honum í hug að semja tónverk af þessu tagi. Sagan segir frá Pétri sem stelst út á engið í óþökk afa síns. Þar glímir hann við ógnvættina ógurlegu; úlfinn, með hjálp fuglsins og kattarins, en úlfurinn hefur þá þegar gleypt veslings öndina sem hafði synt í makindum á tjörninni. Verkið var samið til að kynna fyrir börnum hljóðfærin í sinfóníuhljómsveitinni. Flautan leikur fuglinn, óbóið öndina, klarinettið köttinn, fagottið afann, hornið úlfinn og einnig skiptast öll hljóðfærin á að leika stef Péturs í stað strokhljóðfæranna. Hin mikla athygli og vinsældir sem verkið fékk kom meira að segja höfundinum sjálfum á óvart.

Allir eru velkomnir á tónleikana og eru nemendur nemendur Tónlistarskólans sérstaklega hvattir til að mæta ásamt fjölskyldum sínum og vinum. Aðgangur er ókeypis.

Fjölbreyttur og skemmtilegur tónfundur í dag, mánudaginn 12. nóvember kl.17.30 í Bíósal Duus-húsa.

Allir velkomnir.

Fimmtudaginn 8. og föstudaginn 9. nóvember verða starfsdagar í Heiðarskóla. Þar sem starfsdagarnir fara fram á Akureyri, verður ekkert af starfsfólki Heiðarskóla tiltækt, þannig að við getum ekki kennt í húsnæði skólans. Kennarar Tónlistarskólans hafa því endurskipulagt hljóðfæratímana hjá Heiðarskólanemendum þessa daga og fært tímana í önnur húsnæði okkar. Allir hljóðfæranemendur Heiðarskóla sem eiga að vera í tímum fimmtudaginn 8. eða föstudaginn 9. nóvember, eiga að hafa fengið upplýsingar um hvar hljóðfæratímarnir verða.

Forskóli Tónlistarskólans í Heiðarskóla fellur niður þessa daga.

Föstudaginn 26. og mánudaginn 29. október n.k. verður vetrarfrí í Tónlistarskólanum eins og hjá grunnskólunum hér í Reykjanesbæ.

Öll kennsla í Tónlistarskólanum fellur því niður þessa daga.

Það sem af er skólaárinu hafa verið haldnir 3 tónfundir, dagana 16., 17. og 22. október s.l. Tónfundirnir, þar sem fram kom glæsilegur hópur nemenda, voru vel undirbúnir , skemmtilegir og mjög vel sóttir af áheyrendum.

Tónfundir eru mjög mikilvægur þáttur í tónlistarnáminu og eitt að því sem þeir stuðla að, er að vinna bug á svokölluðum „sviðsskrekk“. Því reglulegar sem nemendur koma fram á tónfundum og öðrum tónleikum, því auðveldar eiga þeir með að koma fram og spila fyrir aðra. Það er því mjög mikilvægt að aðstandendur nemenda styðji við bakið á sínu fólki og öðrum nemendum um leið, með því að mæta vel á tónleika skólans.

Stórsveit frá Sct. Mariae Skole í Álaborg í Danmörku, „Sct. Mariae Skoles Bigband“ kemur í heimsókn til okkar á sunnudaginn kemur, þann 14. október. Sveitin sem skipuð er 30 hljóðfæranemendum á aldrinum 17-20 ára, leikur við messu í Keflavíkurkirkju kl. 11 á sunnudaginn og heldur síðan tónleika með Léttsveitinni okkar kl. 16 í Stapa, Hljómahöllinni.

Á tónleikunum í Stapa munu Hljómsveitirnar leika sína efnisskrána hvor, en síðan munu þær frumflytja nýtt tónverk eftir danska tónskáldið Jesper Riis, sem hann skrifaði sérstaklega fyir þessar tvær stórsveitir með styrk frá Norræna menningarsjóðnum. Verkið er eins konar syrpa af íslenskum og dönskum þjóðlögum.

Stjórnendur stórsveitanna eru Gert Norgaard og Karen J. Sturlaugsson.

Aðgangur á tónleikana er ókeypis og öllum heimill.

Tónfundinum sem vera átti í dag í Bíósal kl.17.30 er frestað um viku vegna jarðarfarar Guðrúnar Rósu Guðmundsdóttur. Tónfundurinn verður þriðjudaginn 16. október kl.17.30 í Bíósal Duus-húsa.

Tónlistarskólinn verður lokaður, þ. m.t. skrifstofan, frá kl.12.00 til kl.16.00 n.k. þriðjudag, þann 9. október, vegna útfarar Guðrúnar Rósu Guðmundsdóttur, ræstitæknis.

Á morgun, fimmtudaginn 4. október, fellur niður öll kennsla við tónlistarskólann vegna svæðisþings tónlistarskólakennara.

Nú ættu allir nemendur sem komist hafa að í skólanum,  að vera búnir að fá tilkynningu um kennsludaga og tíma í öllum námsgreinum.

Kennsla hefst n.k. mánudag, þann 27. ágúst.