Tónlistarskóli Reykjanesbæjar

Tónlistarskóli Reykjanesbæjar stendur fyrir söngnámskeiði ætluðu fólki sem er í kórum á Suðurnesjum. Um er að ræða mjög praktískt námskeið fyrir fólk sem nú þegar er í kór en vill bæta sig raddlega og í nótnalestri. Námskeiðið er jafnframt ætlað þeim sem hafa enga reynslu af kórsöng en langar að byrja í kór.

Allar nánari upplýsingar um námskeiðið er að finna undir hnappinum „Söngnámskeið fyrir kórafólk“ hér að ofan!

Tónlistarskólar landsins eru um 90 talsins. Í þeim fer fram gríðarlega fjölbreytt og öflugt starf og á hátíðisdegi þeirra, Degi tónlistarskólanna, efna skólarnir til ýmiskonar viðburða til að vekja athygli á starfsemi sinni. Markmiðið er að auka sýnileika og styrkja tengsl tónlistarskólanna við nærsamfélagið. Dagur tónlistarskólanna er haldinn annan laugardag í febrúar ár hvert, sem nú ber upp á 11. febrúar.

Dagskrá skólans fer fram í Hljómahöllinni og hefst í Stapa kl.10.30 með sérstakri dagskrá fyrir Forskóla 2 og aðstandendur þeirra. Forskólinn heldur þar stutta tónleika við undirleik kennarahljómsveitar og síðan fá forskólanemendur hljóðfærakynningar og prufutíma á hljóðfæri á efri hæð Tónlistarskólans til kl.11:45. Frá kl.11.00 -15.15 verður keppni í tónfræði milli tónfræðibekkja á barna og unglingastigi. Keppnin fer fram í Stapa. Inn á milli verða stuttir tónleikar, eða ör-tónleikar, í Bergi á klukkustundar fresti. Kaffihús Strengjadeildar verður starfrækt frá kl.10:45 – 15:45 en í boði verða veitingar á vægu verði. Ágóðinn rennur í ferðasjóð deildarinnar. Dagskrá Tónlistarskóla Reykjanesbæjar á Degi tónlistarskólanna er hér fyrir neðan.

Við getum bætt við okkur nokkrum söngelskum börnum í Barnakór Tónlistarskóla Reykjanesbæjar. Kórinn er ætlaður börnum á aldrinum 9-12 ára (í 4. til 7. bekk) og er fyrir bæði nemendur tónlistarskólans og önnur börn á þessum aldri sem búsett eru í Reykjanesbæ. Nemendur í Barnakórnum þurfa ekki að vera nemendur tónlistarskólans að öðru leiti.

Þau kórbörn sem ekki eru nemendur tónlistarskólans þurfa að greiða kórgjald, sem er stillt mjög í hóf, eða 10.000kr. fyrir önnina. Almennir nemendur Tónlistarskólans greiða hins vegar ekki kórgjaldið.

Æfingar eru á þriðjudögum kl.17:00-18:00 og föstudögum kl.15:00-15:45 í Tónlistarskólanum, Hjallavegi 2. Umsækjendur verða teknir í raddprófun áður en inntaka í kórinn er staðfest. Athugið að aðeins er um nokkur pláss að ræða.

Innritun fer fram á skrifstofu skólans sem er opin mán., þri., fim. og fös. frá kl.13-17 og mið. frá kl.9-13. Umsóknarfrestur er til og með föstudeginum 13. janúar n.k.

Síðastliðnar tvær vikur hafa farið fram tæplega 30 jólatónleikar og nemendur staðið sig frábærlega. Nú fara allir í kærkomið jólafrí frá og með morgundeginum 21. desember og fyrsti kennsludagur á nýju ári er miðvikudagurinn 4. janúar. Starfsfólk Tónlistarskólans óskar öllum gleðilegra jóla og farsældar á nýju ári.

Fréttabréf skólans – Tónvísir – er nú komið út og hægt að nálgast það á flipa hér að ofan. Í því eru skemmtilegar fréttir og öll dagsskrá jólatónleika okkar.

Lionsklúbbur Njarðvíkur veitti í gær, sunnudaginn 27. nóvember, Tónlistarskóla Reykjanesbæjar myndarlegan styrk eins og klúbburinn hefur gert árlega, mörg undanfarin ár. Styrkurinn var að venju afhentur í Verslunarmiðstöðinni Krossmóa við sama tækifæri og jólahappdrætti Lionsklúbbs Njarð

víkur var sett í gang. Styrkurinn er kærkominn og verður varið til að styrkja tónleikahald nemenda skólans.

Tveir gítarnemendur skólans, Alexander Grybos og Luka Bosnjak, léku tvö jólalög við þetta tækifæri, ásamt kennara sínum.

Tónlistarskóli Reykjanesbæjar og Tónlistarfélag Reykjanesbæjar standa saman að tónleikum þar sem gítarleikarinn Arnaldur Arnarson leikur nokkrar af fegurstu perlum klassískrar gítartónlistar, m.a. verk eftir Johann Sebastian Bach, Heitor Villa-Lobos og Isaac Albéniz.

Tónleikarnir verða fimmtudaginn 10. nóvember kl.19.30 í tónleikasalnum Bergi í Hljómahöll. Aðgangur er ókeypis og allir velkomnir. Gengið verður inn um inngang Tónlistarskólans.

Arnaldur Arnarson fæddist í Reykjavík árið 1959 og hóf gítarnám í Svíþjóð tíu ára gamall. Hann sótti síðan gítarnám í Tónskóla Sigursveins D. Kristinssonar hjá Gunnari H. Jónssyni og lauk þar námi vorið 1977.  Hann stundaði framhaldsnám í Englandi og á Spáni, þar sem helstu kennarar hans voru Gordon Crosskey, John Williams, George Hadjinikos og José Tomás. Með sigri í 21. alþjóðlegu „Fernando Sor“ gítarkeppninni í Róm 1992 og með einleikstónleikum á Listahátíð í Reykjavík sama ár skipaði Arnaldur sér á bekk með fremstu tónlistarmönnum Íslands. Hann hefur margoft komið fram á Íslandi og haldið tónleika í Evrópu, Ástralíu, Bandaríkjunum og Suður Ameríku. Arnaldur hefur um árabil kennt gítarleik og verið aðstoðarskólastjóri við Luthier Tónlistar- og dansskólann í Barcelona en hyggst starfa meira á Íslandi næstu misseri. Hann hefur haldið námskeið í tónlistarflutningi víða um heim og setið í dómnefndum í alþjóðlegum tónlistarkeppnum.

Skemmtilegt samstarf hefur myndast milli Tónlistarskóla Reykjanesbæjar og Arnaldar á síðustu mánuðum. Kennarar skólans fengu athyglisverðan fyrirlestur hjá Arnaldi í fræðslu- og kynnisferð sinni til Barcelona s.l. sumar og gítarnemendur skólans hafa í þessari Íslandsferð Arnaldar, fengið masterklass-kennslu hjá honum.

Tónlistarskólinn verður í vetrarfríi föstudaginn 21. október og mánudaginn 24. október n.k. Öll kennsla fellur niður þessa daga. Sjáumst hress aftur þriðudaginn 25. október.

Tónleikar og fyrirlestur í Bergi

Tónleikafyrirlestur með Önnu Málfríði Sigurðardóttur píanóleikara verður haldinn í Bergi Hljómahöll, miðvikudaginn 12. október kl.17:30. Aðgangur er ókeypis og allir velkomnir.
Anna Málfríður  mun fjalla um tónskáldin Mozart og Liszt  og einnig um verkin sem leikin verða. Tónleikarnir hefjast kl. 17:30  og eru rúmlega einn og hálfur tími með hléi.

Skoðað verður m.a. hvað þessi tónskáld áttu sameiginlegt þó að yfir 50 ár skildi þau að í tíma og hvernig ferðalög og kynni af öðrum tónskáldum og verkum þeirra höfðu áhrif á þeirra eigin tónsmíðar.
Á efnisskrá verða einungis verk eftir Wolfgang A. Mozart og  Franz Liszt, þ.á.m. hin þekkta sónata Mozarts sem oft er nefnd „Alla Turca“ og þrjár Petrarca Sonnettur eftir Liszt, sem hann umskrifaði eftir samnefndum sönglögum sínum og eru samin við texta eftir ítalska skáldið Francesco Petrarca. Auk þess verða á efnisskránni Fantasían í d moll eftir Mozart og Waldesrauschen eftir Liszt.

Miðvikudagurinn 5. október er Alþjóðadagur kennara. Í tilefni af því mun Tónlistarskóli Reykjanesbæjar bjóða öllum áhugasömum að koma í skólann, að Hjallavegi 2, Reykjanesbæ,  þann dag á milli kl. 17 og 19. Á neðri hæð skólans fara fram þennan dag á þessum tíma, margs konar samæfingar nemenda undir handleiðslu kennara. Æfingarnar fara fram að þessu sinni fyrir opnum dyrum og er gestum velkomið að tilla sér inn í stofu eða sali og fylgjast með æfingunum.
Það sem verður í gangi á neðri hæðinni á þessum tíma er lúðrasveitaræfing, Slaghörpu-hópur, Rokkhljómsveit, Rafgítarkór og Söngdeild sem verður með 2 mismunandi hóptíma. Auk þess verða hljóðfæri Bjöllukórsins til sýnis og kynningar. Vonandi sjá sem allra flestir sér fært að kíkja við í Tónlistarskólanum á miðvikudaginn milli kl.17 og 19. Hollar veitingar verða í boði í tilefni af Heilsu- og forvarnarviku í Reykjanesbæ.