Tónlistarskóli Reykjanesbæjar

Næst komandi sunnudag þann 15. nóvember heldur SÍSL (Samtök íslenskra skólalúðrasveita) maraþontónleika undir yfirskriftinni „Óskalög þjóðarinnar í blásarabúning“ í Norðurljósasal Hörpu.

Hljómsveitir víðs vegar að af landinu leika efnisskrá fyllta íslenskum lögum, með áherslu á þau lög sem kepptu um titilinn “Óskalög þjóðarinnar” á RÚV síðasta vetur. Búast má við að lög eins og Dimmar rósir, Bláu augun þín og Draumur um Nínu muni hjóma á tónleikunum í útsetningum fyrir blásarasveitir, að ógleymdu óskalaginu sjálfu,  Þannig týnist tíminn, eftir Bjartmar Guðlaugsson.

Tvær lúðrasveitir skólans taka þátt, lúðrasveit C og lúðrasveit D. Sú fyrri leikur kl.15 undir stjórn Hörpu Jóhannsdóttir og sú seinni kl.16 undir stjórn Karenar Sturlaugsson og í báðum sveitum aðstoðar Þovaldur Halldórsson.

Tónleikarnir hefjast klukkan 11:00 og standa til klukkan 18:00. Hver hljómsveit hefur hálftíma til umráða og verður skipt um hljómsveit á heila og hálfa tímanum allan daginn. Áhorfendum er boðið að sitja eins lengi og þeim hentar og fylgjast með gróskunni í íslensku blásaralífi. Aðgangur er ókeypis og öllum opinn.

Vetrarfrí verður í Tónlistarskólanum föstudaginn 23. október og mánudaginn 26. október 2015 og fellur þá öll kennsla niður.

Njótið helgarinnar!

Föstudaginn 2. október fara kennarar í FT (Félag kennara og stjórnenda í tónlistarskólum) á þing á Selfossi. Þar með fellur öll kennsla þeirra sem fara á þingið niður.

Enn eru laus pláss á hljóðfærum sem kennt er við skólann. Þau eru ekki mörg og þarf fólk því að hafa hraðar hendur ef það vill tryggja sér pláss. Hljóðfærin sem um ræðir eru eftirfarandi:

Selló
Kontrabassi
Trompet/kornett
Alt-horn
Söngur

Sótt er um á skrifstofu skólans í Hljómahöll og á mittreykjanes.is

Marta Alda Pitak

Hvatningarverðlaun Íslandsbanka, til nemanda við Tónlistarskóla Reykjanesbæjar, fyrir skólaárið 2015-2016, voru afhend á skólaslitum skólans í maí 2015. Eru þau tíundu í röðinni og hefur þetta samstarf Tónlistarskólans og Íslandsbanka verið farsælt og einstaklega ánægjulegt.

Hvatningarverðlaunin að þessu sinni hlaut Marta Alda Pitak, nemandi í fiðluleik og píanóleik.
Marta hóf tónlistarnám 6 ára gömul í Forskóla Tónlistarskóla Reykjanesbæjar og í fiðluleik, og það varð öllum fljótt ljóst að hún var gædd miklum tónlistarhæfileikum.
Marta sýndi strax mikinn áhuga á tónlistarnáminu og hefur alla tíð sinnt því einstaklega vel, bæði tónfræðagreinunum og hljóðfæranáminu. Dugnaður hennar og hæfileikar hafa orðið til þess að hún hefur náð miklum árangri og er komin mjög vel á veg í fiðlunáminu þrátt fyrir ungan aldur, en hún varð 14 ára í gær.
Marta lauk Miðprófi í fiðluleik vorið 2014, þá aðeins 13 ára gömul og er því komin á framhaldsstig í fiðluleik, sem er frekar óvenjulegt hjá nemanda á þessum aldri. Auk þess lauk hún Miðprófi í tónfræðagreinum og Grunnprófi í píanóleik á þessu vori.
Marta hefur leikið með strengjasveitum skólans frá því hún hafði getu til, auk þess sem hún hefur alltaf verið dugleg að taka þátt í ýmsum öðrum samleiksverkefnum. Marta hefur tekið þátt í alls konar viðburðum á vegum skólans og oft komið fram fyrir hans hönd út á við.

Að þessu sögðu er ljóst að Marta Alda er vel að því komin að hljóta Hvatningarverðlaun Íslandsbanka og vonandi verður sú viðurkenning henni hvati til áframhaldandi dugnaðar og þroska í tónlistarnáminu.

Fræðsluráð Reykjanesbæjar afhenti Hvatningarverðlaun fræðsluráðs miðvikudaginn 26. ágúst en Tónlistarskóli Reykjanesbæjar hlaut 2 tilnefningar til verðlaunanna. Aðra fyrir uppsetningu á óperunni „Brúðkaup Fígarós“ eftir W.A. Mozart, sem skólinn setti upp s.l. vor í samstarfi við Óperufélagið Norðuróp og hina fyrir starfsemi Bjöllukórs skólans. Tónlistarskólinn hlaut svo sjálf Hvatningarverðlaunin fyrir starfsemi Bjöllukórsins undir stjórn Karenar Sturlaugsson. Tilnefningarnar og Hvatningarverðlaunin eru mikil viðurkenning fyrir skólann, bæði starfsfólk og nemendur og það sem hann stendur fyrir.

Kennarar Tónlistarskólans mæta galvaskir til vinnu eftir sumarfrí föstudaginn 21. ágúst. Þá hefst undirbúningsvinna fyrir veturinn og stundaskráargerð. Foreldrar og forráðamenn mega búast við því að fá símtal frá umsjónarkennara sinna barna um miðja næstu viku þar sem nemendum er úthlutað sínum hljóðfæra- og hópkennslutímum.
Framhaldsskólanemendur eru hvattir til þess að koma með stundaskrá sína á skrifstofu skólans til að auðvelda sínum kennara skipulag stundatöflu sinna nemenda.

Föstudaginn 28. ágúst hefst hljóðfærakennsla og hljómsveitarstarf samkvæmt stundaskrá og mánudaginn 7. sept hefst kennsla í tónfræðagreinum.

Skólaslit Tónlistarskólans fara fram miðvikudaginn 27. maí kl.18 í Stapa. Allir nemendur eiga að mæta og taka við vitnisburðarskírteini sínu. Þeir sem ekki mæta verða að nálgast sín skírteini á skrifstofu skólans því þau verða ekki send út í pósti.