Tónlistarskóli Reykjanesbæjar

Hausttónleikar Lúðrasveitar Tónlistarskóla Reykjanesbæjar verða haldnir á morgun, þriðjudaginn 19. nóvember kl.17.30 í Stapa, Hljómahöllinni. Að þessu sinni eru tónleikarnir óvenju snemma dags, sem kemur til vegna landsleiksins við Króatíu.

Á tónleikunum koma fram yngsta, mið og elsta lúðrasveit skólans. Það kennir ýmissa grasa í efnisskrá tónleikanna, en þó einkennast þeir af kvikmyndatónlist sem verður þema tónleikanna. Jafnframt verða sýnd myndskeið úr viðkomandi kvikmyndum. Sem dæmi, þá verður leikin tónlist úr kvikmyndunum Kitty Kitty Bang Bang, The Simpsons, Forrest Gump og tónlist úr Disney-kvikmyndum.

Stjórnendur lúðrasveitanna eru Áki Ásgeirsson, Baldvin I. Tryggvason, Emil Þ. Emilsson, Harpa Jóhannsdóttir og Karen J. Sturlaugsson.

Búast má við skemmtilegri stemmningu og líflegum tónleikum.  Aðgangur er ókeypis og öllum heimill.

Tónlistarskólinn verður í vetrarfríi föstudaginn 18. og mánudaginn 21. október n.k. Öll kennsla í skólanum fellur því niður þessa daga.

Nú standa yfir starfsdagar í Tónlistarskólanum, þar sem verið er að setja saman stundatöflur og klára annan undirbúning fyrir skólaárið sem er að hefjast.

Kennsla hefst í öllum námsgreinum, þriðjudaginn 27. ágúst.

Hljóðfærakennarar/söngkennarar munu hafa samband við nemendur/forráðamenn á næstu dögum, þ.e. fyrir 27. ágúst, og tilkynna tíma í þeim námsgreinum sem nemendur eiga að sækja.

Þriðjudagur 21. maí: 25 ára afmælistónleikar Léttsveitarinnar í Stapa kl.20.00. Fram kemur Léttsveitin eins og hún er skipuð núna og einnig Léttsveit fyrrum félaga í sveitinni.

Miðvikudagur 22. maí: Vortónleikar lúðrasveitarinnar kl. 19.30 í Stapa. Fram koma yngsta, mið og elsta sveit.

Fimmtudagur 23. maí: Skólaslit kl.18.00 í Stapa. Tónlistaratriði, afhending áfangaprófsskírteina og vitnisburðarblöð vetrarins afhent.

Nokkrir af kennurum skólans standa fyrir tónleikum í Bíósal, Duushúsum, laugardaginn 4. maí kl.14.00. 

Fram koma Anna Hugadóttir, víóluleikari, Berglind Stefánsdóttir, flautuleikari, Gréta Rún Snorradóttir, sellóleikari, Sigurjón Bergþór Daðason, klarinettleikari, Þorvaldur Már Guðmundsson, gítarleikari og Örvar Ingi Jóhannesson, píanóleikari. 

Á tónleikunum verður leikin fjölbreytt efnisskrá, bæði í einleik og samleik, með vel þekktum klassískum verkum í bland við skemmtileg smálög. 

Aðgangur er ókeypis og allir velkomnir.

Nú eru Ársprófin hafin fyrir nemendur í hljóðfæranám og söng. Prófin standa yfir frá og með deginum í, fimmtudaginn 18. apríl til og með miðvikudeginum 24. apríl. Allir nemendur eiga að vera komnir með prófdag, próftíma og staðsetningu.

Þessa daga fellur kennsla niður í hljóðfæradeildum og söngdeild. Í einstaka tilfellum gætu þó nemendur átt að mæta í tíma, en þá hefur kennari tekið það sérstaklega fram.

Athugið að kennsla í tónfræðagreinum, samspili og hljómsveitum fellur EKKI niður.

Lúðrasveit Tónlistarskóla Reykjanesbæjar og Hljómsveitin Valdimar halda sannkallaða Stór-tónleika á kosningadaginn, laugardaginn 27. apríl n.k. kl.19.30 í Andrews-leikhúsi.  Flutt verða þekktustu lög Hljómsveitarinnar Valdimars í splunkunýjum útsetningum fyrir þessar tvær hljómsveitir.

Miðasala er hafin á midi.is og er miðaverð aðeins kr. 2000

Það má enginn láta þessa tónleika fram hjá sér fara. Athugið að Andrews leikhús tekur ekki nema um 490 manns. „Fyrstir koma –  fyrstir fá“.

Sigmar Marijón Friðriksson, harmonikunemandi við skólann, sigraði í harmonikukeppni S.Í.H.U. Sambands íslenskra harmonikuunnenda, sem haldin var í Garðabæ s.l. laugardag. Hann keppti í flokki 12 ára og yngri.

Þetta er keppni til Íslandsmeistara og Sigmar ber því titilinn „Íslandsmeistari í harmonikuleik 2013“,  í sínum aldursflokki.

Kennari Sigmars Marjóns er German Khlopin.

Tónlistarskólinn óskar Sigmari og German til hamingju með sigurinn.

Hægt er að sjá myndir frá keppninni á www.harmoniku-unnendur.com