Tónlistarskóli Reykjanesbæjar

N.k. mánudag, þann 16. mars, verður starfsdagur í öllum grunnskólum og leikskólum Reykjanesbæjar en ekki í Tónlistarskólanum. Öll hljóðfærakennsla sem vanalega er í húsnæði grunnskólanna færist í Tónlistarskólann í Hljómahöll og sömuleiðis falla allir hóptímar niður.

Í ljósi þeirra ákvarðana sem íslensk stjórnvöld hafa tekið vegna útbreiðslu COVID-19 veirunnar og þau kynntu nú fyrir helgi um samkomubann og samkomutakmarkanir næstu 4 vikurnar mun starf Tónlistarskólans eðlilega taka miklum breytingum.
Eftir stranga fundarsetu um helgina hefur komið tilskipum frá Sambandi íslenskra sveitarfélaga að öll hópkennsla falli niður í Tónlistarskólum/Skólahljómsveitum landsins meðan samkomubann er í gildi. Þetta þýðir að hljómsveita- og hópæfingar og tónfræðitímar falla niður í okkar skóla. Þetta á auðvitað líka við um alla þá tónleika sem voru á dagsskrá hjá okkur.

Varðandi einkakennslu (hljóðfæra- og söngtímar) þá mega þeir eingöngu fara fram í Tónlistarskólanum í Hljómahöll. Kennarar skólans hafa ekki heimild til þess að kenna einkatíma í grunnskólum bæjarins og fara næstu dagar í það að endurskipuleggja stundaskrá allra þegar fyrirkomulag grunnskólanna liggur fyrir. Kennarar munu vera í góðu sambandi við sína nemendur og forráðamenn.

Í öllum tilfellum munum við taka fullt mark á fyrirmælum stjórnvalda um dreifingu, þ.e. 2 metrar á milli fólks.

Aðgengi annarra en nemenda og starfsfólks inn í skólann er ekki lengur heimilt.
Þeir sem aka börnum sínum í tónlistarsólkann eða sækja, og hafa hingað til fylgt þeim inn, mega það ekki á meðan samkomubann varir. Við bendum forráðamönnum og öðrum að hafa samband í gegnum síma eða tölvupóst.

Svo hvetjum við nemendur eindregið til þess að þvo sér vel um hendur þegar inn er komið og nota handspritt, en það er í boði á salernum nemenda á báðum hæðum og í öllum kennslustofum. Minnum einnig á að ef nemendur eru veikir eiga þeir að halda sig heima.

Til forráðamanna nemenda í 2. bekk grunnskólanna / Forskóla 2.
Sú ákvörðun hefur verið tekin, að vegna útbreiðslu COVID-19 veirunnar falla forskólatónleikarnir niður, sem áttu að vera í dag 12. mars.
Þessi ákvörðun er tekin í samráði við bæjaryfirvöld Reykjanesbæjar.

Til að taka af allan vafa þá mun kennsla í Tónlistarskólanum ekki raskast ef til verkfalls kemur hjá félagsmönnum BRSB, hvorki í grunnskólunum né í Tónlistarskólanum. Þeir nemendur sem sækja sína hljóðfæratíma í grunnskólum bæjarsins mæta í sína tíma þó röskun sé á starfi þeirra.

Eins og ykkur öllum er eflaust kunnugt um hefur ríkislögreglustjóri lýst yfir hættustigi almannavarna í samráði við sóttvarnalækni og embætti landlæknis vegna kórónaveiru (COVID-19). Við leggjum nú sérstaka áherslu á hreinlæti, s.s. reglulegan handþvott og notkun handspritts í skólanum okkar með það fyrir augum að fyrirbyggja smithættu.

Á salerni skólans eru komnar leiðbeiningar um handþvott og dælur með sprittvökva. Einnig munu kennarar þrífa helstu snertifleti; nótnaborð á píanóum, nótnastadíf, hurðarhúna o. fl.) með sprittvökva milli kennslustunda. Mikilvægt er að heima sé rætt við börnin og þeim leiðbeint um handþvott, að hósta eða hnerra í olnbogabót en ekki lófa og annað sem fram hefur komið að gæti hægt á eða komið í veg fyrir smit.

Nemendur þurfa að koma með sín eigin skriffæri í Kjarnatíma og aðrar tónfræðagreinar og nemendur fá ekki lánaða trommukjuða eða hljóðfæri á hljómsveita-og samspilsæfingum.

Við bendum jafnframt á mikilvægar upplýsingar frá Embætti landlæknis um hvernig forðast eigi smit kórónuveirunnar Covid-19 og hvað eigi að gera ef grunur vaknar um smit.

Einnig er bent sérstaklega á lykilsímanúmerið 1700, sem allir eiga að hringja í ef áhyggjur af smiti eru til staðar. Á vefsíðum almannavarna og embættis landlæknis eru bestu upplýsingarnar um þessi mál.

Stjórnsýslan og heilbrigðisyfirvöld vinna nú kappsamlega gegn útbreiðslu veirunnar og viljum við leggja áherslu á að farið sé að tilmælum sóttvarnalæknis og annarra sérfræðinga hvað snertir hreinlæti, sýkingarvarnir, sóttkví og samstöðu.

Hér má finna upplýsingar sem ætlaðar eru fyrir börn og ungmenni: https://www.landlaeknir.is/um-embaettid/greinar/grein/item39277/Grunnupplysingar-um-koronaveiruna-fyrir-born-og-ungmenni?fbclid=IwAR0dQ7LnkDMF5cX7-citHdP2_-xmrlENAP_IrOXt782uQQBO1wK4_qNwgbY

Hér er fréttatilkynning frá Embætti landlæknis vegna kórónaveirunnar þar sem m.a. koma fram leiðbeiningar vegna ferðalaga, https://www.landlaeknir.is/um-embaettid/frettir/frett/item39279/frettatilkynning-vegna-koronaveirunnar-covid-19-28022020?fbclid=IwAR3X30IWGunhIuhhmtTIi1nmX4UIF7WZ4mLkx_AmoFkSFr9gBsqjay-ILfA

Öskudagurinn, miðvikudaginn 26. febrúar, er starfsdagur hjá okkur í Tónlistarskólanum. Þá er engin kennsla, hvorki einkatímar né hóptímar.

TILKYNNING: Bæjaryfirvöld/Fræðsluyfirvöld Reykjanesbæjar hafa tekið þá ákvörðun að kennsla í skólum Reykjanesbæjar (þar með talið í Tónlistarskólanum) falli niður á morgun, föstudaginn 14. febrúar, vegna slæmrar veðurspár.

The Musicschool will be closed due to bad weather friday the 14th of February!

Við höldum okkar árlegu hljóðfærakynningu fyrir nemendur í Forskóla 2, sunnudaginn 9. febrúar, í tilefni af „Degi tónlistarskólanna“ sem er daginn áður.
Dagskráin hefst kl. 10.30 með tónleikum í Stapa þar sem forskólanemendurnir koma fram og flytja tvö lög við undirleik kennarahljómsveitar.
Síðan færa allir sig yfir í Tónlistarskólann þar sem kennarar og jafnvel nemendur verða í stofum og taka á móti forskólabörnunum, sem fá þar tækifæri til að prófa flest þau hljóðfæri sem kennt er á í skólanum, spjalla um hljóðfærin og forvitnast um allt sem tengist þeim. Þá gefst forráðamönnum forskólanemendanna gott tækifæri til að kynna sér námið.
Dagskránni lýkur kl.12.00
Lúðrasveit skólans verður með kaffihús og kökubasar í skólanum, frá kl.10.30 – 12.30. Ágóðinn rennur í ferðasjóð lúðraveitarinnar, en hún fer í sumar í tónleikaferð til Frakklands.

Tónlistarskóli Reykjanesbæjar 20 ára
N.k. laugardag, þann 1. febrúar, mun Tónlistarskóli Reykjanesbæjar standa fyrir æfingadegi og tónleikum þar sem fram koma gítarsveitir skipaðar nemendum á klassíska gítara. Auk þátttöku gítarsveita innan skólans, fær hann til sín góða gesti, sem eru gítarsveitir frá Tónlistarskóla Árnesinga, Tónskóla Sigursveins og Tónlistarskólanum í Garði og verða þátttakendur alls u.þ.b. 50 talsins. Auk þess mun Svanur Vilbergsson, gítarleikari og kennari við Listaháskóla Íslands flytja efnisskrá þar sem hann „spilar og spjallar“ við nemendur og kennara.

Gítarsveitadeginum lýkur svo kl.16.00 með tónleikum í Bergi, Hljómahöll. Á tónleikunum leikur hver gítarsveit 1 eða 2 lög og þeim lýkur svo með því að allar sveitirnar leika sameiginlega, sem einskonar sýnishorn af afrakstri dagsins.  Gítarsveitadagurinn er þáttur í 20 ára afmælishaldi skólans.

Aðgangur að tónleikunum er ókeypis og allir velkomnir.

Tónlistarskólinn óskar nemendum sínum og aðstandendum gleðilegra jóla og farsældar á nýju ári. Mánudagurinn 6. janúar er starfsdagur og hefst kennsla samkvæmt stundaskrá í öllum greinum þriðjudaginn 7. janúar!

Kæru nemendur og forráðamenn.

Vegna einstaklega slæmrar verðurspár í dag,  þriðjudaginn 10. des, og fyrirhugaðrar lokunar Reykjanesbrautar, fellur allt skólastarf í Tónlistarskólanum niður frá kl.13.00.
Lesa meira