Tónlistarskóli Reykjanesbæjar

Nú er allt starfsfólk komið til starfa að skipuleggja komandi starfsár. Skrifstofan er opin og allir þeir nemendur sem hafa fengið úthlutað plássi eiga að vera komin með staðfestingu á því.

Umsjónakennarar munu hafa samband á næstu dögum og úthluta sínum nemendum tímasetningum, bæði fyrir einkatíma og hóptíma.

• Þriðjudagur 27. ágúst: Hljóðfæra- og söngkennsla hefst.
• Mánudagur 2. september: Kennsla í tónfræðagreinum hefst.
• Hljómsveita- og samspilsæfingar, sem og hóptímar innan söngdeildar, hefjast eins fljótt og unnt er.

SKÓLASLIT 2019
Skólanum var slitið síðasta föstudag 24. maí. Á þeirri athöfn fengu nemendur sem lokið höfðu grunn- og miðprófum í hljóðfæraleik og söng prófskírteini sín ásamt nemendum sem höfðu lokið miðprófi í tónfræðigreinum.
Haraldur Árni skólastjóri fór yfir það allra helsta sem var á döfinni í vetur og boðið var upp á tónlistaratriði frá Bjöllukór skólans og kom Bergur Daði Ágústsson trompetnemandi einnig fram. 
Í lok athafnar voru Hvatningaverðlaun Íslandsbanka veitt, en þau verðlaun eru veitt einum nemanda sem hefur skarað fram úr þann veturinn og var það slagverksnemandinn Kristberg Jóhannsson sem hlaut þau. Útibússtjóri Íslandsbanka Sighvatur Gunnarsson veitti verðlaunin.

SKRIFSTOFAN OG NÝJAR UMSÓKNIR
Það er alltaf opið fyrir nýjar umsóknir (hnappur hér að ofan), en ef nemandi vill eiga möguleika á því að komast að næsta skólaár, er mjög æskilegt að sótt sé um í síðasta lagi 7. júní n.k. Eftir þann dag verður unnið úr nýjum umsóknum. Þeir sem fá skólavist, fá tilkynningu um það í tölvupósti. Aðrar umsóknir fara á biðlista.
Skrifstofa skólans verður lokuð frá mánudeginum 27. maí til þriðjudagsins 11. júní. Hún verður þá opin til og með föstudeginum  14. júní. Eftir það verður hún lokuð til 19. ágúst.

Kristberg og Sighvatur

Nemendur sem luku grunnprófi ásamt skólastjóra og aðstoðarskólastjóra

INNRITUN

Nú er heppilegur tími til að sækja um skólavist fyrir skólaárið 2019-2020.
Enn eru nokkur laus pláss fyrir nýja nemendur, m.a. á  trompet, horn, básúnu, túbu, klarinett, þverflautu, saxófón, rafbassa, harmoníku, fiðlu.
Einnig getum við bætt við okkur örfáum nemendum í Suzuki-blokkflautu og Suzuki-píanó.
Sækja skal um hér á vefnum undir hnappnum „Nýjar umsóknir“.
Því fyrr sem sótt er um, því meiri líkur eru á að komast að.

SKÓLASLIT

Skólaslit verða í Stapa, Hljómahöll, föstudaginn 24. maí kl. 18.00.
Tónlistaratriði. Afhending prófskírteina. Hvatningarverðlaun Íslandsbanka veitt.
Allir hjartanlega velkomnir

SKRIFSTOFAN

Skrifstofa skólans verður lokuð frá mánudeginum 27. maí til þriðjudagsins 11. júní. Hún verður þá opin til og með föstudeginum  14. júní.
Eftir það verður hún lokuð til 19. ágúst.

Nú styttist í annan endann á þessum vetri og tónleikavertíðin að hefjast. Hér til hliðar á viðburðadagatali okkar eru komnir inn allir tónleikar vorsins, bæði einkatónleikar og hljómsveitatónleikar. 

Skólaslit fara fram föstudaginn 24. maí kl.18:00 í Stapa og er gert ráð fyrir því að allir nemendur skólans komi á þau. Þar fá nemendur afhent vitnisburðarblöð með einkunnum og umsögnum kennara sinna. 

Fréttabréf Tónlistarskólans, Tónvísir, er einnig komið út og hægt að nálgast það hér eða í flipanum að ofan!

1. maí – Baráttudagur verkamanna er frídagur og engin kennsla.

Ekki fótboltaleikur heldur tónleikar!

Strengjasveit skipuð nemendum frá bænum Valkeakosky í Finnlandi heldur tónleika í Stapa, Hljómahöll, ásamt strengjanemendum úr Tónlistarskóla Kópavogs og Tónlistarskóla Reykjanesbæjar.
Tónleikarnir verða laugardaginn 27. apríl og hefjast kl. 15.
Finnsku gestirnir flytja sérstaka efnisskrá og síðan leika hóparnir þrír saman. Aðgangur er ókeypis og allir velkomnir.

Fimmtudaginn 21. mars blæs Forskóli 2 til stórtónleika og fær með sér í lið eldri lúðrasveit skólans og rokkhljómsveit. Tónleikarnir eru tvennir og eru í Stapa. 
Í Forskóla 2 eru allir nemendur 2. bekkjar í Reykjanesbæ, þau hafa æft af kappi vænlega efnisskrá í allan vetur undir handleiðslu kennara frá Tónlistarskólanum.
Fyrri tónleikarnir hefjast kl.17 og koma þar fram nemendur úr Akurskóla, Holtaskóla, Myllubakkaskóla og Stapaskóla.
Seinni tónleikarnir hefjast kl.18 og koma þar fram nemendur úr Háaleitisskóla, Heiðarskóla og Njarðvíkurskóla.
Tónleikarnir henta öllum aldurshópum og er aðgangseyrir enginn.

Mánudaginn 25. mars er komið að elstu nemendum skólans þar sem tónleikar lengra kominna nemenda fara fram í Bergi kl.19:30. Þar koma fram okkar elstu og færustu nemendur og sýna fram á snilli sína með fjölbreyttri og skemmtilegri dagsskrá. Allir eru velkomnir og er aðgangseyrir enginn.

Fimmtudaginn 7. mars fara fram lúðrasveitatónleikar í Stapa kl.18. Þar koma fram yngri og eldri sveit skólans og flytja fjölbreytta og skemmtilega dagsskrá. Það eru allir velkomnir og enginn aðgangseyrir.