Hópastarf fellur niður og grímuskylda

Öllu hópastarfi hefur verið slegið á frest frá og með miðvikudeginum 21. október, gildir í óákveðinn tíma. Þetta á við um alla tónfræðitíma, samspil, hljómsveitir og hóptíma innan söngdeildar. Tónfræðikennslan mun færast í fjarkennslu og vinna nú kennarar hörðum höndum að þeirri skipulagningu.

Öll hljóðfæra- og söngkennsla (einkakennsla) verður hins vegar eins og venjulega, út í grunnskólunum og hér í tónlistarskólanum.

Fjarkennsla frá og með mánudeginum 26. október, í óákveðinn tíma:
*Allur Kjarni. Kennarar: Gíslí, Elín og Jóna.
*Nótnalestur. Kennarar: Dagný og Kristinn.
*Tónheyrn, hljómfræði, jass-hljómfræði, tónlistarsaga. Kennarar: Magni, Eyþór og Gísli.

Fellur niður um óákveðinn tíma, frá og með miðvikudeginum 21. október:
*Allt hljómsveitastarf.
*Öll samspil.
*Kór söngdeildar.
*Opin söngdeild, klassísk.
*Opin söngdeild, rytmísk.
*Leiklist söngdeildar.

Grímuskylda fyrir alla fædda árið 2004 eða fyrr
Frá og með miðvikudeginum 21. október n.k. verður tekin upp grímuskylda hér í tónlistarskólanum.

*Nemendur eiga að vera með grímu á göngum/stigagöngum skólans, biðsvæðum og salernum.
*Nemendur eiga að vera með grímu í öllum kennslustundum þar sem hægt er að koma því við.
*Í þeim námsgreinum sem ekki er hægt að hafa grímu, skal hún tekin niður þegar nemandinn er kominn inn í kennslustofuna og sett upp aftur áður en gengið er út úr stofunni.
*Í þeim tilfellum sem ekki er hægt að hafa grímu í kennslustundum, skulu bæði kennari og nemandi gæta a.m.k. 2 metra fjarlægðar sbr. 5. gr. gildandi reglugerðar um takmörkun á skólastarfi.
*Fjarlægðartakmarkanir skulu vera í samræmi við gildandi geglugerð hverju sinni, þar til grímuskyldan verður afnumin.

Frekari upplýsingar um starfsemi skólans í heimsfaraldri er að finna undir hnappnum „COVID-19 og sóttvarnarreglur“ hér að ofan.

Vetrarfrí

Mánudaginn 19. okt og þriðjudaginn 20. okt er vetrarfrí í Tónlistarskólanum og fer því engin kennsla fram. Við vonum að nemendur okkar og forráðamenn hafi það gott í fríinu.

Smit og hóptímar falla niður

Miðvikudaginn 14. október kom upp Covid-smit hjá einum nemanda okkar, sem nú er að sjálfsgðu í einangrun. Í tengslum við það er nánast öll Lúðrasveit B komin í sóttkví sem og 4 kennarar skólans. Smitrakningateymi Almannavarna er komið með allar nauðsynlegar upplýsingar og setur sig í samband við hópinn varðandi næstu skref.
 

Í ljósi útbreiðslu smita hér í Reykjanesbæ og fólks í sóttkví þá falla niður allir hóptímar frá og með fimmtudeginum 15. október. Þetta eru allir tónfræðitímar, hljómsveita- og samspilsæfingar, kór og leiklist söngdeildar og tónleikar sem voru á dagsskrá hjá okkur. Staðan verður tekin aftur eftir vetrarfrí skólans sem er dagana 19. og 20. október.

Skerping á reglum varðandi COVID

Í ljósi þróunar yfirstandandi Covid-bylgju, þá er nauðsynlegt að setja að nýju skýrar reglur hér í skólanum varðandi umgengni eldri nemenda og forráðamanna og skerpa á sóttvarnarhegðun.
Um er að ræða nemendur 16 ára og eldri (þ.m.t. fullorðnir nemendur) og forráðamenn nemenda almennt.

Nemendur 16 ára og eldri:
-Þessi aldurshópur er eindregið hvattur til að nota grímur í þeim kennslustundum sem hægt er að koma því við. Þeir sem það gera þurfa sjálfir að koma með grímur.
-Jafnframt að passa upp á fjarlægðarmörk, t.d. í biðaðstöðu á báðum hæðum skólans og í kennslustofum eins og hægt er.
-Að þvo sér vel um hendur og spritta áður en gengið er inn í hóptímastofur. Það eru sprittbrúsar framan við hverja hóptímastofu.
-Að þvo sér vel um hendur rétt áður áður en farið er í einkatíma og spritta þegar inn í stofuna er komið. Það eru sprittbrúsar í öllum hljóðfæra- og söngstofum.
-Séu nemendur slappir, lasnir eða með kvef, óskum við eftir því að þeir mæti ekki í tónlistarskólann, heldur tilkynni veikindi.

Forráðamenn:
-Vinsamlegast ekki koma inn í skólann nema þið eigið brýnt erindi.
-Séu nemendur slappir, lasnir eða með kvef, óskum við eftir því að þeir mæti ekki í tónlistarskólann og veikindi séu tilkynnt.
-Þátttaka foreldra í námi Suzukinemenda er brýnt erindi, svo eðli málsins samkvæmt fylgja þeir börnum sínum í hljóðfæra – og hóptíma.
-Foreldrar Suzukinemenda eru eindregið hvattir til að nota grímur eins og hægt er og þvo hendur og spritta rétt áður en farið er í tíma. Þeir sem nota grímur þurfa sjálfir að koma með þær.
-Foreldrar Suzukinemenda gæti að fjarlægðarmörkum meðan beðið er eftir að kennslustund hefjist.
-Að þið hvetjið börn ykkar til að þvo sér vel um hendur hér í skólanum og spritta áður en þau fara í tíma.

Upphaf skólaársins 2020-21

Skrifstofan opnar eftir sumarleyfi þriðjudaginn 18. ágúst og er opin alla virka daga frá kl.9-17. 
Þau sem hafa fengið inngöngu í nám fengu staðfestingu á skólavist í júní sl. Aðrir fara sjálfkrafa á biðlista.

Kennsla í hljóðfæragreinum og söng hefst miðvikudaginn 26. ágúst.
Kennsla í tónfræðagreinum hefst mánudaginn 31. ágúst
Lúðra-, strengja- og gítarsveitaæfingar hefjast mánudaginn 31. ágúst
Önnur samspil og hóptímar hefjast eins fljótt og auðið er, kennarar láta sína nemendur vita.

Umsjónakennarar hafa samband við sína nemendur varðandi tímasetningar allra einka- og hóptíma.

Lok skólaársins og innritun

Vortónleikar
Vortónleikar standa yfir frá og með 15. maí til og með 27. maí.
Dagsskránna er að finna hér að ofan undir hnappnum „Vortónleikar 2020“.
Vegna gildandi samkomutakmarkana verður tónleikunum streymt á YouTube, án tónleikagesta, hér.

Skólaslit
Síðasti kennsludagur vetrarins er þriðjudagurinn 26. maí.
Skólaslit verða í Stapa, Hljómahöll, föstudaginn 29. maí kl.18.00.
Afhending áfangaprófsskírteina. Hvatningarverðlaun Íslandsbanka veitt. Tónlistaratriði.
Skólaslitunum verður streymt á YouTube án gesta hér.

Innritun
Nú er heppilegur tími til að sækja um skólavist fyrir skólaárið 2020-2021.
Því fyrr sem sótt er um, því meiri líkur eru á að komast að.
Sækja skal um á hér á heimasíðunni undir hnappnum „Endurnýjun og nýjar umsóknir“

Tónvísir
Vorútgáfa fréttabréfs skólans, Tónvísis, er nú komið út og hægt að nálgast það hér.

 

Skólastarf frá 4. maí

Nú hefur það verði útfært af Sambandi íslenskra sveitarfélaga í samráði við sóttvarnaryfirvöld, hvernig starfsemi tónlistarskóla skuli háttað frá og með mánudeginum 4. maí. Það er skemmst frá því að segja að við getum hafið eðlilegt skólastarf að nýju þann dag, sem er mjög gleðileg niðurstaða.

Skólastarfið út skólaárið:
Hjá okkur verður það þannig að hljóðfærakennsla út í grunnskólunum verður með eðlilegum hætti, sem og forskólakennslan (1. og 2. bekkur).

Önnur hljóðfærakennsla, söngkennsla og meðleikur fer fram að nýju í tónlistarskólanum. Hins vegar gildir tilskipun um 2 metra fjarlægðarmörk þegar nemendur eldri en á grunnskólaaldri mæta í tíma.

Allar tónfræðagreinar færast aftur inn í tónlistarskólann og hljómsveita- og samspilsstarf verður með þeim hætti sem hæfir hverjum hópi þær fáu vikur sem eftir lifir af skólaárinu.

Stefnt er að því að halda alla vortónleika sem og tónleika nemenda á framhaldsstigi, en án tónleikagesta. Við vonumst til þess að hægt verði að streyma þeim öllum.

Skólaslit verða í Stapa, Hljómahöll, föstudaginn 29. maí kl.18.00, sem er skv. skóladagatali.  Viðstaddir verða einungis þeir sem koma að skólaslitunum með beinum hætti, þ.e. nemendur sem taka við áfangaprófsskírteinum sínum, nýr handhafi Hvatningarverðlauna Íslandsbanka, þeir nemendur sem munu flytja tónlist og svo við skólastjórnendur. Alls rétt innan við 50 manns sem verður dreift um salinn.
Skólaslitunum verður streymt.

Eftir 4. maí gilda ennþá almennar sóttvarnaráðstafanir um hreinlæti, sótthreinsun og notkun handspritts í öllum skólum. Mælst er til þess að sem fæstir fullorðnir komi í skólabyggingar og á það m.a. við um foreldra, iðnaðarmenn og almenna gesti. Hvatt er til sérstaks hreinlætis, sótthreinsunar og handþvotta.

Starfsdagur

Starfsfólk Tónlistarskóla Reykjanesbæjar óskar nemendum sínum og fjölskyldum gleðilegra páska. Þriðjudagurinn 14. apríl er starfsdagur og engin kennsla þann daginn. Kennarar munu hafa samband við sína nemendur varðandi kennslu næstu vikurnar sem helst með óbreyttu sniði á meðan samkomubann stendur yfir.

Fjarkennsla í Tónlistarskóla Reykjanesbæjar

Frá og með morgundeginum, miðvikudeginum 25. mars, munum við hefja fjarkennslu í öllum tónfræðagreinum, sem og í öllum hljóðfæragreinum og söng.
Það fyrirkomulag verður viðhaft á meðan smithætta vegna Covid-19 veirunnar varir og takmarkanir á skólahaldi eru í gildi.
Kennsla í Tónveri verður áfram í skólanum.

Nú þegar hafa verið sendir út 2 tölvupóstar til nemenda/forráðamanna:
Annars vegar póstur vegna tónfræðakennslunnar til þeirra árganga sem stunda það nám. Í þeim pósti er útlistað hvernig nemendur ná sér í aðgang að fjarkennslunni.
Hins vegar póstur til allra hljóðfæra- og söngnemenda. Kennarar munu hafa samband við nemendur sína varðandi útfærslu kennslunnar.

Við vonumst til þess að nemendur verði virkir og duglegir í þessu nýja fyrirkomulagi og í góðu sambandi við kennara sína.